Die koue kombuis

Dit is winter in die Kaap en`n doodgewone Vrydagoggend in ons huis. Ek le nog n bietjie in die bed met net my neus wat uitsteek, toe my man heel verontwaardig met my koppie koffie aankom. "Ek het nou net die temperatuur in die kombuis gemeet." se hy. "Dis 12 grade celsius!"

Nou wat ek daarop antwoord? Ja, dit is koud in die winter. Dit moet so wees. Mens trek pantoffels aan en kamerjasse! En dan wag mens tot die sonnetjie uitkom en gaan buitentoe om n bietjie warmte op te suig.

 Maar sien, my man is n duitser. Ek het hom ingevoer. Sy grootwordjare in Hamburg is nog lank nie vergete nie. Hy onthou dan dat dit binne-in geboue veronderstel is om warm of ten minste warmrig behoort te wees. Veral in die winter en veral in die kombuis en nog meer so in die badkamer. Sentrale verhitting vanselfsprekend.

Aan die begin toe ons hiernatoe getrek het (2005), het hy geen probleem daarmee gehad om sommer vir ure die verwarmers aan te he nie, maar na die laaste elektrisiteitsrekening van die stad, begin hy ook se ons moet maar bietjie spaarsamer wees en miskien tog nog n lagie klere aantrek.

Ons lag lekker as hy sy "lange ellie" onder sy sweetpakbroek aantrek in die aande as hy klaar gestort is. Dis nou sy lang onderbroek wat hy nog oorhet van sy tye toe hy diensplig gedoen het in Duitsland. Dis so n olyfgroen jobbie met n y-front en lekker nou pype ondertoe sodat die koue hom nie van onder kan vang nie. Hy se, lag maar lekker, ek is nou die een wat lekker warm kry! En hy`s reg!

Ek het lank genoeg daar anderkant gewoon om te weet dat die weer n baie groot rol speel by die duitsers. Daar`s allerhande reels en segoed rondom die weer.

Die temperatuur in die huis word so tussen 18 en 21 grade gehou. Saans mag dit n bietjie afkoel, maar asseblief tog net nie laer as 16 grade raak nie. Soggens is die eerste lekkerte dan die warm badkamer (as iemand nie vergeet het om die deur toe te maak nie...wat gewoonlik ek was...ai toggie ). Daarna as almal nou hulle klere aanhet word daar "gelueftet" ( ge-lug). Dit beteken, maak nie saak hoe koud dit buite is nie, die vensters word wawyd oop geruk en vars, koue lug stroom in en verfris alles. Dit werk ook goed,as iemand nie vergeeet om die vensters weer toe te maak nie ( wat gewoonlik weer ek was ).

Dan kom ons by die klere en skoene. Ai jennetjie tog. Mens het lang jasse en kort jasse en baadjies in dik en dun, wollerig of glad, weerbestand of nie. O ja, donker kleure vir winter en ligte kleure vir herfs en lente is n moet. Die skoene word uitgesoek volgens leersole of plastieksole afhangende van die hoeveelheid nattigheid wat mens dink jy gaan daardie dag teekom en dan is daar ook nog die sokkies van wol en katoen wat n groot verskil maak...ek is nie sarkasties nie, dis regtig so.

Ek gaan nie daaroor uitbrei nie, maar onthou daar is ook nog musse of pette of hoedens en ook kopbande wat uitgesoek moet word om te pas by die handskoene uit word of leer of sintetiese materiaal. Die besluit of n sambreel saamgevat moet word is n baie belangrike een. Tot my ouers was verbaas toe n reenbuitjie ons eendag in Hamburg verras en almal rondom ons binne sekondes sambrele uit niks uit optoor. "Waar steek hulle dit weg?" vra my ma "En hoe het hulle geweet dit gaan reen?" Ek weet nie, ma, ek weet nie.

As onervare Suid-Afrikaner kan dit dan gebeur dat n mens jouself lekker warm aantrek en dink jy't nou aan alles gedink, OK, alles! Buite is dit so om die 0 grade en jy stap stasie toe,  ry met die trein stad toe en dan stap jy na een van daardie groot indrukwekkende winkels toe. Jy kry glad nie koud nie, want jy`s mos nou lekker warm aangetrek en die stap help ook vir die bloedsomloop. Soos wat jy die outomatiese draaideure binnestap, blaas daar sulke vuurwarm lug op jou, maar jy vermoed nog niks. Na sowat 10 minute kom jy jou fout agter...ja, jy is reg aangetrek vir buite, maar nie vir binne nie, want binne is dit mos 20 of 21 grade! Al die duitsers trek hulle dik buitejasse uit en loop in sjiek woltruitjies rond terwyl jy niks kan uittrek nie, want jy het die pers sloppy jersey aan wat jou ma se vriendin 20 jaar gelede gebrei het. So kan dit gebeur dat mens n mede-landsgenoot ( gelukkig was daar sulkes toe ek daar was ) raakloop wat ook met n hoogrooi, half-verswete gesig rondskarrel om so gou as moontlik alle inkopies klaar te kry. En so leer mens.

Daar word beweer dat daar nie iets soos slegte weer is nie, maar net sleg uitgesoekte klere!

Nou ja toe, ek sien die kaapse wintersonnetjie het nou tog sy kop uitgesteek en ek gaan nou in my voorhuis sit en n lekker koppie koffie drink.

P.S. En moenie worry nie, skat, daar sal nie vannaand n koue kombuis wees nie

[ Als Kalte Küche bezeichnet man in der Gastronomie den Bereich, in dem Speisen angerichtet werden, welche vor dem Servieren nicht mehr erhitzt werden.]